Fornleifaskráning í Náttfaravíkum sem fram fór sumarið 2023 var hluti af verkefninu Eyðibyggðir á ystu annesjum Þingeyjarsveitar en það var styrkt af Fornminjasjóði og Þingeyjarsveit. Líkt og á við um aðrar eyðibyggðir sem skráðar hafa verið síðastliðin ár á milli Eyjafjarðar og Skjálfanda, eru Náttfaravíkur afskekkt og harðbýl sveit en þar er mun minna undirlendi en annarsstaðar þar sem byggð var með ströndinni og landbúnaði því settar miklar skorður. Byggðin þreifst ekki síst á sjósókn og voru verstöðvar í Rauðuvík, Skálavík og Naustavík fyrr á öldum. Minjar í Náttfaravíkum eru í mikilli hættu vegna viðvarandi náttúruvár, einkum landbrots og skriðufalla. Litlar minjar eru orðnar eftir um sjósókn af þeim sökum og þegar hafa ýmsar landbúnaðarminjar horfið undir jarðvegsskriður. Engu að síður er varðveisla minja á svæðinu með besta móti vegna þess hversu lítið rask hefur átt sér stað af manna völdum við túnasléttun, skurðgröft, vegagerð og byggingaframkvæmdir. Það sem helst kom á óvart í skráningunni var áður óþekkt fornbýli í landi Naustavíkur sem virðist hafa farið í eyði snemma á miðöldum. Býlið er nokkuð hátt í landinu, ofan við ströndina, og því tilheyra nokkuð umfangsmiklar minjar. Má þar nefna bæjartóft, meintan kirkjugarð með bænhúsi, túngarð, meint fjós, heygarð og vörslugarð. Sætir þessi fundur nokkrum tíðindum og getur hann varpað ljósi á elstu byggð í Náttfaravíkum og þróun hennar. Í nýútkominni skýrslu um skráninguna er líkum leitt að því að umrætt fornbýli hafi verið frumbýli á svæðinu og að land þess hafi náð yfir lönd lögbýlanna þriggja sem þar byggðust síðar, Kotamýra, Naustavíkur og Vargsness. Hér er hægt að kynna sér skráninguna og helstu niðurstöður rannsóknarinnar: https://www.researchgate.net/publication/398781810_Eydibyggd_a_ystu_annesjum_THingeyjarsveitar_II_-_Nattfaravikur